zuletzt aktualisiert vor

Vörmächtnis bliff lebennig

Von

De Gesprächskreis "Wi kürt Platt" misset bi sienen Jubiläum Friedrich Thöle, de vör teggen Joahr den Kring in gang brocht häff. Dat siär Friedhelm Hackmann ols he leßten Gonsdag in den Wüllker Huse an de dartig Plattdütskfründe willkuomen heeten konn. Dat Wüllker Hus baut den passigen Rum för dat Trüggedenken, denn met den Doukmaker Museum föng olls an.

Am 16. März 1996 kaimp eene Riege Büoweste touhaupe un gaif dat Museum frie. Den naichsten Dag makete dat Museum för olle Lüe de Dür up. In de plattdütsken Sprauke, de bet vör füftig Joahr de Wandmaker am Müehlenorte olltiet küerten, hölt Friedrich Thöle eenen Vörtrag. Naußen menden welke Lüe, in Braumske drofte düsse Sprauke nich verlustig sien, et mösse met Plattdütsk wieter gauhn.

Dat dä et auk! Am 18. Mai 1996 verkloarde Friedrich Thöle de Besökers up Platt wat et in den Museum tou sehn gaif. De Braumsker Naurichten hadden düt Vörhäbben kund daun un masse Lüe lusterten tou. Van frisken bidden Plattfründe Friedrich Thöle, wieter tou maken.

Et wörd vörschlagen, jeden Monat eenmol tauhaupt tou kuomen un Platt küeren. Doarup schreiben am 30. Mai 1996 Friedrich Thöle un Walter Brockmann an welke Lüe eenen Breef. Gonsdag, 19. Juni 1996 aubends ümme half sieben Uhr woll man im Doukmaker Museum de Sake beküeren. Bi düssen Touhaupekuomen wörd fasteleggt, jeden Monat an twetten Gonsdag, aubends 7 Uhr in de Mesterstuoben im Doukmaker Museum sik tou driäpen, ümme Platt tou küeren. Gonsdag, 17. Juli faunen sick knapphen twüntig Plattfründe in un seggeten tou, wieterhin met tou maken.

Tou glieken Tiet maketen de Braumsker sik Gedanken wiägen NDR "Talk op Platt", dat an 7. September ut Braumske üöberdriägen wörd. Friedrich Thöle häff doabi metmaket. Dat gaif nütte Updrif för Platt in Braumske.

Bi de Wiehnachtsfier 1996 met Musik van Kantor Schmidt konn Friedrich Thöle fastestellen, dat sik "Wi kürt Platt" in Braumske tou eene faste Inrichtung utwiesen hadde. Friedhelm Hackmann ut Achmer kreig den Updrag, den Kring touhaupe tou haulen. Dat he düssen Updrag bannig gout naukuomen is, wören sik olle wisse, de leßten Gonsdag kommoud in den Wüllker Huse touhaupe kuomen sind. Eenskup bestönd, wieter tou maken met Plattdütsk in Braumske.


Weitere Angebote, Produkte und Unternehmen der noz MEDIEN